පත්තරකාරයෙක්, පොලිස්කාර‍යෙක් හා හොරෙක්

 මේ ඔබ කියවන්නට යන්නේ Ralph Cotton නම් ලේඛකයා විසින් ලියන ලද Gun Law නම් නවකතාවෙන් උපුටාගත් කොටස් කිහිපයකි. කතාවට පසුබිම් වන්නේ නිව් මෙක්සිකෝ ප්‍රාන්තයේ කින්ඩ්‍රඩ් නගරයයි. එහි මාර්ෂල්වරයා ලෙස අළුතින් පත්වන එමර්සන් කර්න් එහි නගරාධිපති වූ කෝක්ලි ද සමග එක්ව නගරය අවි රහිත කලාපයක් කිරීම සඳහා නීතියක් සම්මත කරගනී. ඒ අනුව සියළුම නගරවැසියන් තමන් සතු අවි ආයුධ මාර්ෂල්වරයා වෙත බාර දිය යුතුය. ඒ සඳහා ඔහු සහය මාර්ෂල්වරුන් කිහිපදෙනෙකු ද බඳවාගනී. ඔහුගේ යටි අරමුණ වන්නේ ආයුධ සියල්ල බාරදුන් පසුව නගරයේ ධනය කොල්ලකා පළායාම ය. මේ අතර නගරයේ සතිපතා පළවන පුවත්පත වන 'කින්ඩ්‍රඩ් ස්ටාර්' හි කතුවරයා හා ප්‍රකාශකයා වන එඩ් ඩැන්ඩ්ලි නගරයෙහි සිදුවෙමින් පවත්නා සිදුවීම් තම පුවත්පත තුළින් වාර්තා කිරීමට පියවර ගනියි.