නොදන්නා බව නොදන්නා විට...

 මේ බ්ලොග් අඩවියේ ආරම්භක පෝස්ට්එක (නැවත බලන්න) නිසා අපූරු අත්දැකීමකට මුහුණ දීමේ (අ)භාග්‍යය මෙය ලියන බ්ලොග්කරුවා වෙත හිමිවිය. සුපුරුදු පරිදි බ්ලොග් සටහන මාගේ Facebook එක මත ද ඇලවූයෙමි. මද වේලාවක් ගත වූ තැන ඉහත දැක්වෙන අවවාදාත්මක අනතුරු ඇඟවීම මා හට ලැබී තිබූ අතර අදාල බ්ලොග් සටහන ද ඉවත්කර තිබුණි.

එයට විරුද්ධව අභියාචනා කිරීමේ වරම ද හිමිකර දී තිබූ නිසා එයින් ද ප්‍රයෝජන ගෙන ඊට අමතරව ප්‍රතිචාර (Feed back) දැක්වීමේ පිටුවට ගොස් මාගේ අදහස් සවිස්තරාත්මකව දන්වා යැවීමි. එම අදහස් සිංහලට නැගුව හොත් මෙසේ දිස්වනු ඇත. 

"ඔබ මාගේ සටහන ඉවත්කිරීමේදී ඊට නිශ්චිත හේතු දක්වා නොතිබීම නිසා එය අනුමාන කරන්නට මට සිදුවේ. එය මවිසින් පරිවර්තනය කර ඉදිරිපත් කළ ලිපිය නිසා නම් ඔබ වාරණය කළයුත්තේ මා නොව ප්‍රකට අමෙරිකානු ලේඛක මාක් ට්වේන්ය. එය ඔහු විසින් ලියන ලද ලියවිල්ලක් බැවිනි. එහෙත් මා අනුමාන කරන පරිදි ඒ එම ලිපියත් සමග පළවූ කාටූනය නිසා නම් ඔබ වාරණය කළයුත්තේ ලෝ ප්‍රකට වෙබ් අඩවියක් වන cartoon movement ය. එම කාටූනයෙන් අදහස් වන්නේ ලෝකයේ ජලය බෙදීයාමේ අසමානතාව හා අසාධාරණය කෙරෙහි අවධානය යොමු කිරීමයි. දැන් ඔබට ගැනීමට ඇති එකම පියවර නම් ඔබ විසින් පෙන්නුම් කර ඇති නූගත්කම හා මුග්ධබව සඟවා ගැනීමයි. තව දුරටත් එය ප්‍රකට වීමට පෙර ඊට අවශ්‍ය පියවර ඔබ විසින් ගනු ඇතැයි බලාපොරොත්තු වෙමි."

ඔවුන් එය වටහාගන්නට ඇතැයි සිතෙන්නේ පසුවදා වනවිට එම සටහන තිබූ අයුරින්ම ප්‍රතිෂ්ඨාපනය කර තිබූ බැවිනි. නමුත් කිසිම හේතු දැක්වීමක් හෝ කණගාටුව ප්‍රකාශ කිරීමක් සිදු නොවීය. මේ සිදුවීම නිසා මා සිත තුළ පැනනැගි ප්‍රශ්න කිහිපයක් මෙසේ සටහන් කිරීමට කැමැත්තෙමි. 

• Facebook හි සදාචාර පොලිසියේ ප්‍රතිපත්ති මෙරට සදාචාර බලධාරීන්ගේ ප්‍රතිපත්ති හා සමපාත වීම සිතාමතා සිදුවන දෙයක් ද? අහම්බයක් ද?
• අදාල රටේ නීතිය හසුරුවන බලධාරීන් කුලප්පු නොවන සේ තම ප්‍රතිපත්ති ඊට අනුකූල වන පරිදි නවාගැනීම හා ඊට සරිලන නියාමකයින් පත්කර ගැනීම Facebook ආයතනය තම ලාබය තකා සිතාමතා කරන්නක් ද? 
• කොතරම් සද්භාවයෙන් ඇතිකරගන්නා නීති වුවත් ඒවා අර්ථ නිරූපනය කරන්නේ පසුගාමී ඔලුවලින් නම් එම නීතිවලින් පලක් වේද?