විලියම් ඩබ්ලිව්. ජොන්ස්ටන් නම් ලේඛකයා විසින් ලියන ලද Sixkiller, U.S. Marshal නම් ප්‍රබන්ධයෙන් උපුටා ගත් කුඩා කොටසකි, පහත දැක්වෙන්නේ.
මේ කතාවට පසුබිම් වන්නේ අමෙරිකා එක්සත් ජනපදයේ සිවිල් යුද්ධයට පසු යුගයයි. ජෝන් හෙන්රි හා හෙක්ටර් ක්‍රෝ ඩෝග් දෙදෙනටම පොදු ලක්ෂණයක් විය. එනම් දෙදෙනාම රතු ඉන්දියානු හා යුරෝපීය දෙමව්පියනට දාව උපන් අය වීමයි. එහෙත් සිවිල් යුද්ධයේදී එක් පාර්ශවයක් වෙනුවෙන් සටන් වැදි ඔවුන් දෙදෙනාගේ සමානකම් එතැනින් නිම වෙයි. සිවිල් යුද්ධය නිම වී කලකට පසුව ඔවුන් දෙදෙන යළි හමු වූ ආකාරයයි මේ.
විලී බක් මෙන්ම හෙක්ටර් ක්‍රෝ ඩෝග් ද යුද්ධයෙන් පසුව ආපසු පැමිණියේ නීතිගරුක පුරවැසියෙකු වීමට නොහැකිව හෝ ඒ සඳහා කැමැත්තක් නොදක්වමිනි. ක්වන්ට්‍රිල්ගේ ආක්‍රමණික කණ්ඩායමට බැඳී සිටි කාලයේ ක්‍රෝ ඩෝග් මිනීමැරුම් හා සොරකම්වලට ලැදියාවක් ඇතිකරගෙන තිබුණි. යුද්ධයෙන් පසුව ද ඒ රසය තෘප්තිමත් කරගැනීමට ඔහු පසුබට නොවීය. යුද්ධයෙන් පසු ජෝන් හෙන්රිට ක්‍රෝ ඩෝග් මුණ නොගැසුනේ ඉන්දියානු වාසභූමියට ඔහු ආපසු නොපැමිණි හෙයිනි. ඔහුගේ නීතිවිරෝධී ක්‍රියා බොහොමයක් සිදු උනේ කැන්සාස්වල ය. මේ ක්‍රියා නිසා කැන්සාස් ප්‍රාන්තයට වඩාත්ම අවශ්‍යව සිටි අපරාධකරුවන්ගෙන් කෙනෙකු බවට ඔහු පත්ව සිටියේය.
කොෆිවිල් නගරයට පිටත වූ පාලමක් අසල ඔහු නැවතී බලා සිටියේ සෙඩාන් දක්වා ගමන් කරන රාත්‍රී අශ්ව කෝච්චිය පැමිණෙන තෙක් ය. අශ්ව කෝච්චියට සවිකර තිබුනේ ආලෝක ධාරා දෙකක් සෘජුව නිකුත් කරන කැටපත් පරාවර්තක සවිකරන ලද ලාම්පු ය. එම ලාම්පුවල ආධාරයෙන් ක්‍රෝ ඩෝග්ට අශ්ව රථය ලඟාවෙනු බලාගතහැකි විය. එසේ වුවද ඔහු හරියටම පාර මැද සිටගෙන සිටියොත් හැරෙන්නට අශ්ව රථයේ සිටින්නවුන්ට ඔහු දර්ශනය වීමට තරම් ප්‍රබල ආලෝකයක් ඉන් විහිදෙන්නේ නැතිබව ක්‍රෝ ඩෝග් දැන සිටියේය.
රථය ලංවත්ම එහි රියැදුරු විසිල් කරන නාදය ද අශ්වයින්ට කතාකරන හඬ ද ක්‍රෝ ඩෝග්ට ඇසුනි. පාලම මතින් යන්නට රථය වේගය අඩුකරත්ම ක්‍රෝ ඩෝග් පාර අයිනේ සිට මැදට පැන්නේය.
"නවත්තනවා ඔහොම! විසිකරනවා තැපැල් මල්ල මෙහාට." ක්‍රෝ ඩෝග් කෑගැසුවේය.
රියැදුරා රථය නවතාගත්තත් ආරක්ෂක භටයා නැගී සිට තුවක්කුව ක්‍රෝ ඩෝග් වෙත එල්ල කළේය. ඔහු කොකා ගැස්සුවේය. එහෙත් තුවක්කුව පත්තු උනේ නැත.
"හා!" කෑගැසූ ක්‍රෝ ඩෝග් දෙවරක් කොකා ගැස්සීය. වෙඩි දෙකින් නිකුත් වූ ගිනිදැල් අකුනුසැරයකදී නිකුත්වන විදුලි එළි මෙන් එක් ක්ෂණයකට රථයේ එක් පසෙක චිත්‍රයක් ඇන්දාක් මෙන් විහිදී ගියේය.
රථය ඇතුලෙහි සිටි එක් මගියෙකු වූයේ මෝසස් ගැරට් ය. ඔහු එක්සත් ජනපදයේ නියෝජ්‍ය මාර්ෂල්වරයෙකු වුවත් මෙදින ඔහු සෙඩාන් වෙත ආපසු එමින් සිටි මගියෙකු පමණක් විය. නැවැත්වීම සඳහා කෙරුනු ඉල්ලීමත් සමගම සිදුවන්නේ කුමක් දැයි වහාම තේරුම්ගත් ඔහු තම ඇඟිල්ල තොල් හරහා තබා නිශ්ශබ්දව සිටින ලෙස අනෙක් මගීන්ට අනතුරු අඟවා මංකොල්ලකරුවා සිටි දෙසට විරුද්ධ පසින් රථයෙන් එලියට බැසගත්තේය. තම පිස්තෝලය අතැතිව ඔහු අශ්ව රථය වටෙන් පැමිණ එහි පසුපසට ආවේ හෙක්ටර් ක්‍රෝ ඩෝග් උඩට නැග තැපැල් මල්ල ගන්නට උත්සාහ කරද්දී ම ය.
පිස්තෝලය ආපසු කොපුවේ දමාගෙන සිටි ක්‍රෝ ඩෝග් තැපැල් මල්ල ඩැහැගැනීමට කොතරම් අවධානයක් යොමුකර තිබුනේ ද යත් ගැරට් පිටුපසින් එනු ඔහු දැක්කේ නැත. ගැරට් ඔහු පසුපසින් සිටින බව පළමුවරට ඔහුට දැනුනේ ගැරට් ඔහුට කතාකළ පසු ය.
"බැහැලා මෙහාට එනවා." ගැරට් පැවසීය.
තම අත පිස්තෝලය දෙසට දිගු වුවද ගැරට් ඔහුගේ පිස්තෝලයේ කොකා මානන හඬ ඇසුන පසු ක්‍රෝ ඩෝග් එම උත්සාහ අත්හැර දැමීය.
"ඔව්, කමක් නෑ. ගන්නවා ආයුධය අතට. පනපිටින් ඉන්නවට වඩා මැරිලා ඉද්දී ඔහේව ගෙනියන එක ලේසියි." ක්‍රෝ ඩෝග් බිමට බැස ආපසු හැරෙන්නට පෙර ගැරට් ඔහුගේ පිස්තෝලය ක්‍රෝ ඩෝග්ගේ හිස මත වැරෙන් පතිත කරේ ඔහු සිහිසුන් කරවමිනි.
"පාර්කින්සන් මහත්මයා?" ගැරට් රථයේ සිටි අනෙක් පිරිමි මගියාට කතා කළේය. "මට උදව්කරන්න මේ මිනිහා බඩු මලු දාන කෑල්ලට පටවන්න. ඊට පස්සේ මම මිනිහට මාංචු දාන්නම්."
හෙක්ටර් ක්‍රෝ ඩෝග්ගේ අපරාධ රැල්ල අවසානයකට පැමිණ තිබුනි. එක්සත් ජනපද මධ්‍යම රජයට අයත් තැපැල් මල්ලක් සොරකම් කළ නිසා එය බරපතල දඬුවම් හිමිවන වරදක් විය. ක්‍රෝ ඩෝග්ගේ නඩුව අසනු ලැබූයේ ඉසාක් පාර්කර්ගේ නඩුකාරයාගේ උසාවියේදී ය. බොහෝ කලකට පෙර ඔහු කිසිදා එල්ලා මරනු ලැබීමටකට ලක්නොවන බව ඔහුගේ ගෝත්‍රයේ වෙදරාළ අනාවැකියක් පලකර තිබුනත් ඔහු වරදකරු වී මරණීය දණ්ඩනයට නියම විය.
ජෝන් හෙන්රි තමාගේ නඩුව සඳහා පෙනීසිටීමට පැමිණියේ හරියටම ඒ වේලාවේ ය. ඔහු පැමිණෙන විට ක්‍රෝ ඩෝග් එල්ලා මැරීම සඳහා සූදානම් කර තිබුනි. ඔහුගේ කකුල් එකට කර බැඳ අත් දෙක ද දෙපසට සිරවන සේ බැඳ එල්ලුම් ගසට නංවා සිටි අතර එක්සත් ජනපද මාර්ෂල් ජෝන් සාර්බර් දැඩි හිරු රශ්මියෙන් පීඩිතව දහදිය වගුරුවමින් සිරකරු පසෙකින් සිටගෙන සිටියේය. එම හිරු රශ්මියම විඳිමින් ප්‍රේක්ෂකයින් සියගණනක් එල්ලුම් ගස දෙස බලාගෙන සිටගෙන සිටියහ. එක් කලු වලාවක් අහසෙහි තිබූ නමුදු හිරු රශ්මියෙන් යම් සහනයක් සලසන්නට තරම් එය විශාල නොවීය. බලකොටුවේ තාප්පවලට පිටින් නවතා තිබූ අශ්ව කරත්ත, දුනු කරත්ත හා අශ්වයින් මිනිසුන් කොතරම් දුර සිට එල්ලා මැරීම බලන්නට පැමිණ ඇත්ද යන්නට සාක්ෂි දැරීය. ඉන් සමහරක් පෙරදින රාත්‍රියේම පැමිණ පිට්ටනියෙහි රාත්‍රිය ගතකර තිබුනේ කැන්සාස්, ආර්කන්සාස්, කොලරාඩෝ හා ඉන්දියානු බල ප්‍රදේශය යන සෑම තැනකම මිනීමැරුම් හා මංකොල්ලකෑම් නිසා අපකීර්තිමත් නමක් හිමිකරගෙන සිටි ක්‍රෝ ඩෝග් නම් මිනිසා එල්ලා මරණයට පත්කරනු දැකගැනීමට ය.
"අර බලන්නකෝ මේ ගිනිගහන අව්වේ දාඩිය පෙරාගෙන හිටගෙන ඉන්න මෝඩ මිනිස්සු දිහා, හරියට දුවගන්න බැරුව හතිදාන අශ්වයෙක් වගේ." ක්‍රෝ ඩෝග් පැවසීය.
"ඔබ හිටගෙන ඉන්නෙත් ඒ අව්වෙම තමා." මාර්ෂල් සාර්බර් පිළිවදන් දුන්නේය.
"ඔව්, ඒත් ඔබට අමතක වෙලා මම තව වැඩි වෙලා මෙතන ඉන්නෙ නෑ කියලා." ක්‍රෝ ඩෝග් පිළිතුරු දුන්නේ මහ හඬින් නැගූ කර්කශ සිනහවක් ද සමග ය.
අඩි පහයි අඟල් හතරකට වඩා නූස් වූ ක්‍රෝ ඩෝග් මිටි අයෙකු වුවද හොඳින් වැඩුන මාංශ පේශි වලින් යුත් ශක්තිමත් පුද්ගලයෙකු විය. උඩ සිට රැස්ව සිටි පිරිස දෙස බලද්දී ජෝන් හෙන්රි දැකීමෙන් ඔහු විශ්මයට පත්විය.
"මේ බලන්නකො වැඩේ. මගේ පරණ යාළුවා ජෝන් හෙන්රි සික්ස්කිලර් නේද මේ?" ඔහු පෝරකය මත සිට කතාකළේය. "ඔබේ පරණ යාළුවා මැරෙන හැටි බලන්න නේද ආවේ, ජෝන් හෙන්රි?"
"මමත් හරියට ඒ වෙලාවටම ආව වගේ පේන්නේ, හෙක්ටර්." ජෝන් හෙන්රි පැවසීය.
"ඒක නෙමෙයි, ජෝන් හෙන්රි, ඔබට මතකද මම එක සැරයක් කිව්වා මම කවදාවත් එල්ලුම් ගස් යන්නෙ නෑ කියලා?" ක්‍රෝ ඩෝග් ඇසීය.
"මට මතකයි."
"එහෙම කිව්වේ මම කවදාවත් එල්ලුම් ගස් යන්නේ නෑ කියලා සෑම් බ්ලැක්හෝස් මට කියපු හින්දයි. මතකයි නේද මිනිහව? අර නාකි වෙදරාළ?"
"මට මතකයි." ජෝන් හෙන්රි පිළිතුරු දුන්නේය.
"ඔව්, මට හිතෙන්නේ ඔය නාකි බැල්ලිගෙ පුතා දැන් මෙතැන හිටියනං කියලා. මම එල්ලුම් ගස් යන්නෙ නෑ කියලා කියන්න මිනිහට මම ඩොලර් එකක් ගෙව්වා. ඒත් මම දැන් එල්ලිලා මැරෙන්නයි යන්නේ. මම මගේ සල්ලි ආපහු ඉල්ලගන්නවා. ඒක තමයි මම කරන්නේ." පැවසූ ක්‍රෝ ඩෝග් යළිත් සිනාසුනේය. "හැබෑටම, ඒ ඩොලර් එකෙන් දැන් මට වෙන යහපතක් නෑනෙ, නේද? ඒත් මං එල්ලෙන කොට ඒක මගේ සාක්කුවේ තියනවට මම කැමතියි. මම නරකාදියට ගියහම සමහර විට මට හොඳට සීතල කරපු බියර් එකක් ගන්න පුළුවන් වෙයි."
"ක්‍රෝ ඩෝග්, අන්තිම වශයෙන් කියන්න දෙයක් තියනවද?" මාර්ෂල් සාර්බර් විමසීය.
"මම ආවෙ මැරෙන්න, මම කතා පවත්වන්න ආවෙ නෑ."
ක්‍රෝ ඩෝග් සාර්බර් දෙස බැලීය. ඊලඟට රැස්ව සිටි සුදු, කලු හා ඉන්දියානු මිනිසුන්ගෙන් සමන්විත වූ පිරිමින්, ගැහැනුන් හා ළමයින් සමූහය දෙස බැලීය. නැවතත් ජෝන් හෙන්රි දෙස බලා සිනාවක් පෑවේය.
"මම ඔට්ටුවක් අල්ලනවා ඔබ දැන් හිතනවා ඇති ඔබටත් මෙතන ඉන්න තිබුනා නං කියලා මේකෙ ලීවර් එක අදින්න, එහෙම නේද, ජෝන් හෙන්රි?"
"අර රියදුරයි එයාගේ ආරක්ෂක භටයයි මරලා ඔබමයි ඔතැනට එන්න මග පාදාගත්තේ, හෙක්ටර්."
"මාත් හිතනවා මම එහෙම කළා කියලා. ඒත් ඒ වෙලාවෙ කරන්න තිබුන එකම දේ එච්චරයි. Da gi yo ‘we ga. Ko ‘hi i ga ge ‘ga,” ක්‍රෝ ඩෝග් පැවසීය. "මට වෙහෙසයි. මම අද ගෙදර යනවා."
“Donada ‘govi—සමු ගනිමු,” ජෝන් හෙන්රි පිළිතුරු දුන්නේය.
"ඒක නෙමෙයි, මාව එල්ලනවා කියලා කිව්වා නේද?" ක්‍රෝ ඩෝග් සාර්බර්ගෙන් ඇසීය.
"ඒක තමයි මම කරන්න යන්නේ." මාර්ෂල් සාර්බර් පිළිතුරු දුන්නේය.
"එහෙනම් මොන නරකාදියකට ද තවත් කැරකෙන්නේ? මේ ඇවිල්ලා ඉන්න මිනිස්සුන්ගේ බලාපොරොත්තු කඩකරන්නද හදන්නේ? ඒගොල්ල හොඳ ෂෝ එකක් බලන්න ඇවිත් තියෙන්නේ. මම තමයි ප්‍රධාන නළුවා. මේ පිස්සු වැඩ ඔක්කොම නවත්තලා ඒක කරමු."
සාර්බර් අළුගෝසුවා දෙස බලා හිස සැලීය. අළුගෝසුවා ලීවරය අදිත්ම ලණුව දිග තිබෙන තෙක් ක්‍රෝ ඩෝග් පහළට ඇදවැටෙද්දී ඔහුගේ බෙල්ල එක් පසෙකට ගැස්සී ඇදී ගියේය.
ඒත් සමගම මහත් බියකරු සිදුවීමක් සිදුවිය. ක්‍රෝ ඩෝග් සිටගෙන සිටි උගුල්දොර ඇරෙත්ම මහත් වූ හඬකින් පුපුරාගිය අකුණකින් පොලව දෙදරා ගියේ පෝරකයෙහි අගුළුදොර ඇරෙන ශබ්දය සම්පූර්ණයෙන්ම යටපත් කරමිනි. බලකොටුවට ඉහලින් රැඳී තිබූ හිරු මුවාකරන්නට තරම්වත් විශාල නොවූ කලු වලාකුළ අකුණු සැරයක් එවන්නට සමත්ව තිබුනේය. ක්‍රෝ ඩෝග් පහලට ඇදවැටෙත්ම ඔහුට අකුණු සැරය වැදුනි. ඔහුගේ සිරුරින් ගිනිපුළිඟු වීසි විය. එල්ලා මැරීම බලන්නට රැස්ව සිටි සෙනග අතුරින් බොහෝ දෙනෙක් කම්පනයට හා බියට පත්ව කෑගසන්නට වූහ. ළමයින් හඬන්නට පටත්ගහ. සමහර කාන්තාවෝ ක්ලාන්ත වූහ. වැදුන අකුණු සැරයෙන් තවමත් දුම් දමමින් තිබූ ක්‍රෝ ඩෝග්ගේ සිරුර ලණුව අග්ගිස්සෙහි එල්ලෙමින් තිබුනේය.
"යකාටම ගියාවේ! නාකි වෙදරාළ කියපු දේ හරිගියා එහෙනම්. ක්‍රෝ ඩෝග් මැරුණේ අකුණු සැරය වැදිලා! ලණුව හිරවෙන්න වෙලාවක් ලැබුනේ නෑ." ජෝන් හෙන්රිගේ මුවින් පිටවිය.
